Flogvallarenningin: síðsta freist at melda til

Í dag er síðsta freist at melda til stóru flogvallarenningina, ið verður komandi leygardag. Ókeypis verður at koyra um vágatunnilin, og veðrið er væntað at verða gott.

Við tyrluni vitja jólamennirnir tiltakið, við onkrum góðum til børnini, og øll, ið ganga ella renna teinin fáa felags luftmynd við sær heimaftur, umframt endurskinsvest.

Atgongumerki skal keypast við at flyta gjaldið á kr. 125 fyri øll yvir 14 ár og kr. 50 fyri børn, á konto í Eik Banka: 9181 367.248-6.

Atgongumerkið skal heintast í FK í Miðvági við framvísan av kvittan uppá bankaflytingina.

Atgongumerkið er eisini lutaseðil har vinningarnir eru 3 ferðaseðlar við Atlantic Airways og eitt vikuskifti á 62N Airport Hotel.

Frá dyrnar lata upp kl. 13:30, verður livandi tónleikur og eftir renningina fæst ókeypis heitt kakao frá MBM og sett verður á stóru flogvallarkakuna frá Sørvágs kommunu. Hetta meðan eyðkendu flogvallaljósini seta sín serliga dám á, nú myrkri leggur seg so tíðliga.

Tey, ið hava hug at kappast um meistaraheitið í flogvallarenning, eru øll við í kappingini um steyp til nr. 1, 2 og 3. Kappast verður í 4 aldursbólkum og bæði monnum og kvinnum. Eisini verður tikið málvideo við, har allir luttakarar koma uppá. Málvideo verður lagt út á heimasíðuna 07vestur.fo aftaná.
Umframt alt hetta, verður eisini høvi at síggja myndaframsýning av útbyggingararbeiðinum og fleiri av stóru maskinunum hjá hjá J&K Petersen og Vága Floghavn.

Upplýsingar um parkering og onnur viðurskifti vera at síggja her á heimasíðuni uppundir tiltakið.

Spurningar ella viðmerkingar kunnu sendast á 07vestur@07vestur.fo

Tíðindasavn rss